Fólk getur óskað eftir stöðu flóttamanns, og gerir það, á grundvelli ótta við ofsóknir vegna kynhneigðar og/eða kynvitundar. Það á skilið sömu mannréttindi og allir aðrir. Það skal koma fram við alla lesbíska, samkynhneigða, tvíkynhneigða, trans og intersex (LGBTI) einstaklinga á flótta, vegalaust fólk í eigin landi og ríkisfangslausa einstaklinga sem jafningja að virðingu og réttindum. Í mörgum löndum eru sambönd fólks af sama kyni refsiverð, jafnvel að viðurlagðri dauðarefsingu. LGBTI flóttafólk er varnarlaust á ferð sinni í leit að öryggi í heimalöndum sínum og meðan það er vegalaust.
UNHCR vinnur að því að halda LGBTI flóttafólki öruggu með verkefnum sem eru örugg og mismuna ekki, í samvinnu við utanaðkomandi aðila til að veita stuðning, örugg rými og finna lausnir. Á tímum þegar hatursorðræða um flóttafólk er í sögulegu hámarki verðum við að taka harða afstöðu gegn hvers kyns andúð, þar á meðal hómófóbíu, transfóbíu og bífóbíu.
UNHCR, Flóttamannastofnun Sameinuðu þjóðanna, hefur í þessari viku hleypt af stokkunum samráðsvettvangi til að kanna leiðir til að tryggja að LGBTI flóttafólk hljóti betri vernd og geti leitað réttlætis og stuðnings þegar það verður fyrir ofbeldi og mismunun.
Fyrsta umferð samráðs við LGBTI-samtök og -baráttufólk fór fram í Genf 16. maí 2019 og þar endurómaði þema ársins sem valið var fyrir alþjóðlegan dag gegn hómófóbíu, transfóbíu og bífóbíu (IDAHOT), „réttlæti og vernd fyrir alla“. Frekara samráð mun eiga sér stað víða um heim á næstu mánuðum.
„UNHCR hefur unnið af krafti að því að tryggja að LGBTI hælisleitendur og flóttafólk sé verndað hvar sem það er, en við þurfum að vera virkari. Þess vegna er svo mikilvægt að heyra frá og vinna með einstaklingum og samtökum sem hafa sérþekkingu á þessum málum,“ sagði Filippo Grandi, flóttamannafulltrúi Sameinuðu þjóðanna.
Á meðan sambönd fólks af sama kyni eru enn refsiverð í yfir 70 löndum um allan heim verður enn margt LGBTI fólk fyrir alvarlegum mannréttindabrotum og ofsóknum í heimalöndum sínum. Þessir einstaklingar eru þvingaðir til að leita öryggis og verndar erlendis og standa oft frammi fyrir svipaðri eða jafnvel meiri hættu við komu til nágrannalandanna.
LGBTI fólk í Sýrlandi stendur frammi fyrir fangelsun, pyndingum og morðum. Samer og Fadi eru tveir sýrlenskir flóttamenn og elskendur sem flúðu til að bjarga lífi sínu. © UNHCR / Diego Ibarra Sánchez
„Það er mikilvægt að við búum til öruggt rými fyrir LGBTI hælisleitendur og flóttafólk svo það finni sig ekki knúið til að fela kynhneigð sína og kynvitund í sjálfsvörn,“ sagði Grandi og benti á að UNHCR hefði á undanförnum árum fjárfest í leiðbeiningum, verkfærum og þjálfun um LGBTI málefni fyrir starfsfólk sitt og samstarfsaðila.
Flóttamannafulltrúinn sagði að á undanförnum árum hafi margt gott verið gert, svo sem samstarf með LGBTI leiðtogum í Afríku til að ná til fólks og fjölga þeim sem nýta sér þjónustu, uppbygging á tengslaneti við atvinnurekendur til að skapa atvinnutækifæri fyrir LGBTI flóttafólk í Ameríkuríkjum og stofnun LGBTI stuðningshópa fyrir ungmenni í Mið-Austurlöndum.
„Baráttan fyrir LGBTI réttindum er um okkur öll. Hún snýst um fjölbreytileika okkar og manngæsku. Við ættum öll að vera virk í baráttunni gegn hómófóbíu, transfóbíu og bífóbíu,“ sagði hann.
Juan flúði gengjaofbeldi í Hondúras eftir að hafa verið hótað af þeim sem ná í nýja meðlimi og óskar nú eftir alþjóðlegri vernd í Mexíkó. ©UNHCR/Elisabet Diaz Sanmartin
„Við ættum að hafa rétt til að vera við sjálf, vera frjáls og vera örugg,“ segir Pedro, trans maður sem neyddist til að flýja El Salvador. Í Gvatemala varð hann ástfanginn af Luciu, trans konu. ©UNHCR/Pablo Villagran
Starfsmenn og samstarfsaðilar standa fyrir framan regnbogafána sem hangir utan á höfuðstöðvum UNHCR þann 17. maí í tilefni alþjóðadags gegn hómófóbíu, transfóbíu og bífóbíu. ©UNHCR/Susan Hopper
Deila á Facebook Deila á Twitter
