ՄԱԿ ՓԳՀ-ն բարձր է գնահատում ԵՄ աջակցությունը հակամարտությունից տուժած ընտանիքներին

ՀՀ-ում ԵՄ պատվիրակության համագործակցության բաժնի ղեկավարի տեղակալ Սիլյա Կասմանը գնահատանքի հավաստագիր է ստանում ՀՀ-ում ՄԱԿ ՓԳՀ ներկայացուցիչ Աննա-Կարին Օստից՝ ԵՄ-ի կողմից ՄԱԿ ՓԳՀ-ին 2021 թվականի ընթացքում ցուցաբերված առատաձեռն աջակցության համար, որը Փախստականների գործակալությանը հնարավորություն տվեց իրականացնել իրավական պաշտպանության, կանանց հզորացման, ինքնապավինման խթանման գործողությունների Լեռնային Ղարաբաղից տեղահանված ընտանիքների համար. մայիսի 23, 2022 թ.։ © UNHCR/Aramazd Ghalamkaryan

ԵՄ աջակցությունը, որը տրամադրվել էր 2021 թվականի Միջգործակալական արձագանքման ծրագրի շրջանակում, ՄԱԿ ՓԳՀ-ին հնարավորություն տվեց ժամանակին եւ արդյունավետ իրավական պաշտպանություն տրամադրել Հայաստանում փախստականի իրավիճակում գտնվող ընտանիքներին, որոնց թվում էին խոցելի կանայք, երեխաներ, տարեցներ եւ հատուկ կարիքներ ունեցող անձինք։

Տրամադրված ֆինանսավորմամբ՝ ՄԱԿ ՓԳՀ գործընկեր Հայկական Կարմիր խաչի ընկերության (ՀԿԽԸ) միջոցով գործարկվեցին համայնքային աջակցության նախաձեռնություններ՝ ի նպաստ փախստականի իրավիճակում գտնվող անձանց եւ հյուրընկալող համայնքների խաղաղ գոյակցության, ինչպես նաեւ՝ ՄԱԿ ՓԳՀ-ն հնարավորություն ստացավ մի շարք կարեւոր միջոցառումներ իրականացնել, ինչպիսիք են իրավական պաշտպանության մշտադիտարկումը, դեպքերի կառավարումը, իրավական պաշտպանությունը, կարողությունների զարգացումը, ինչպես նաեւ միջգործակալական համակարգման կառուցակարգի բարելավումը։

ՄԱԿ ՓԳՀ-ն ծրագրեր է իրականացրել նաեւ կանանց համար, այդ թվում՝ տեղացի, որոնց նպատակն էր կենսապայմանների բարելավման եւ հյուրընկալող համայնքներում ներգրավման միջոցով խթանել նրանց ինքնապավինումը։

Միջոցառումը տեղի ունեցավ Հրազդանի «Կանանց հզորացման ռեսուրս կենտրոն» համայնքային ՀԿ-ում, որին մասնակցում էին ՀՀ-ում ԵՄ պատվիրակության համագործակցության բաժնի ղեկավարի տեղակալ Սիլյա Կասմանը, Հրազդանի քաղաքապետ Սեւակ Միքայելյանը, ՄԱԿ-ի մշտական համակարգող Լիլա Փիթրս Յահիան, ՀՀ-ում ՄԱԿ ՓԳՀ ներկայացուցիչ Աննա-Կարին Օստը, ինչպես նաեւ համայնքային ՀԿ-ներ, տեղացի եւ փախստականի իրավիճակում գտնվող ընտանիքներ։

Ընդունելություն Հրազդանի քաղաքապետի գրասենյակում. ձախից աջ՝ ՀՀ-ում ՄԱԿ ՓԳՀ ներկայացուցիչ Աննա-Կարին Օստ, Հրազդանի քաղաքապետ Սեւակ Միքայելյան, ՄԱԿ-ի մշտական համակարգող Լիլա Փիթրս Յահիա, ՀՀ-ում ԵՄ պատվիրակության համագործակցության բաժնի ղեկավարի տեղակալ Սիլյա Կասման, մայիսի 23, 2022 թ.: © UNHCR/Aramazd Ghalamkaryan

«Այսօրվա միջոցառումը հնարավորություն է՝ նշանավորելու ընդունող համայնքների հյուրընկալությունը եւ տեղահանվածների դիմակայունությունը, ովքեր վճռել են նոր կյանք սկսել, սովորել, արարել եւ իրենց ներդրումն ունենալ հյուրընկալող համայնքներում», – ասաց ՄԱԿ-ի մշտական համակարգող Լիլա Փիթրս Յահիան։

«ՄԱԿ ՓԳՀ-ն խորին շնորհակալություն է հայտնում Եվրոպական միությանը՝ փախստականի իրավիճակում գտնվող ընտանիքներին իր պատրաստակամ օգնության համար», – միջոցառմանն ասաց ՄԱԿ ՓԳՀ ներկայացուցիչ Աննա-Կարին Օստը։ «ԵՄ օժանդակությունը ՄԱԿ ՓԳՀ-ին եւ իր գործընկերներին հնարավորություն տվեց իրականացնելու արդյունավետ եւ բովանդակային պաշտպանություն ու համայնքային աջակցության միջոցառումներ, ներառյալ՝ հոգեբանական, սոցիալական եւ իրավական օգնություն, ինչպես նաեւ կրթական եւ կենսապահովմանն ուղղված աշխատանքներ, այդպիսով օժանդակելով փախստականի իրավիճակում գտնվող շուրջ 26,000 մարդու, ինչպես նաեւ նրանց ջերմությամբ ընդունած եւ հյուրընկալած համայնքներին։

«ԵՄ-ն երախտապարտ է իր գործընկերներին, մասնավորապես՝ ՄԱԿ ՓԳՀ-ին, ինչպես նաեւ այլ գործընկերների՝ թե՛ կարիքի մեջ գտնվողներին օգնելու, թե՛ փախստականներին ճիշտ ժամանակին արդյունավետ ու բովանդակային պաշտպանություն տրամադրելու իրենց անդուլ ջանքերի համար։ ԵՄ-ի առաջնահերթ խնդիրն է շարունակական աջակցություն ցուցաբերել փախստականի իրավիճակում գտնվողներին եւ հյուրընկալող համայնքներին», – նշեց ՀՀ-ում ԵՄ պատվիրակության համագործակցության բաժնի ղեկավարի տեղակալ Սիլյա Կասմանը։

Տարածել Facebook-ով Տարածել Twitter-ով