ՄԱԿ ՓԳՀ-ն ողջունում է Ճապոնիայի ժողովրդի աջակցությունը հակամարտությունից տուժած ընտանիքներին

Հայաստանում ՄԱԿ ՓԳՀ ներկայացուցիչն իր շնորհակալությունն է հայտնում Հայաստանում Ճապոնիայի դեսպանին, հունվարի 19, 2022, ք. Աշտարակ, © UNHCR/Mission Armenia/ Lilit Harutunyan

2022 թվականի հունվարի 19-ին ՄԱԿ ՓԳՀ-ն ՀՀ-ում Ճապոնիայի դեսպանությանն իր շնորհակալությունը հայտնելու և մարդասիրական օգնության ազդեցությունը ցույց տալու կապակցությամբ Արագածոտնի մարզի Աշտարակ քաղաքում միջոցառում էր կազմակերպել։ Արարողությունը տեղի ունեցավ Աշտարակի տարածքային մանկավարժահոգեբանական աջակցության վերջերս վերանորոգված ու վերազինված կենտրոնում, որը ծառայում է որպես մանկավարժահոգեբանական աջակցության վայր ու կացարան հակամարտության հետևանքով տեղահանված անձանց համար։

Արարողությանը, որին ներկա էին Հայաստանի Հանրապետությունում Ճապոնիայի արտակարգ և լիազոր դեսպան Մասանորի Ֆուկուշիման և այլ պաշտոնյաներ, ուղեկցվեց ՄԱԿ ՓԳՀ գործընկեր «Առաքելություն Հայաստան» ՀԿ-ի կողմից կարողությունների ձևավորման ու համայնքային աջակցության միջոցառումների դիտարկումներով, Կենտրոնի բնակիչների, մանկավարժների ու հոգեբանների հետ զրույցներով:

«Մենք խորապես համոզված ենք, որ թե՛ անապահով մարդիկ, թե՛ հյուրընկալող համայնքները կհաղթահարեն բոլոր դժվարությունները», – Ճապոնիայի արտակարգ և լիազոր դեսպան Մասանորի Ֆուկուշիմա։

Ճապոնիայի ֆինանսական աջակցությամբ ՄԱԿ ՓԳՀ-ն հակամարտությունից տուժած ընտանիքներին կարողացել է համայնքային աջակցության և կարողությունների ձևավորման նպատակով օժանդակություն տրամադրել, վերանորոգել և տեխնիկական սարքավորումներ ու կահույք տրամադրել 30 կրթադաստիարակչական կենտրոնների / ժամանակավոր կացարանների, հինգ մարզերում համայնքային խաղադաշտեր և մարզադաշտեր կառուցել, դրամական օգնություն տրամադրել կենտրոնի բնակիչներին՝ հոգալու իրենց կենսական կարիքները, ինչպես նաև մասնակի փոխհատուցել վարձակալությամբ բնակվողների վարձավճարները։

«Ինձ համար, ի դեմս Ճապոնիայի կառավարության, մեծ պատիվ է մասնակցել այսօրվա փակման արարողությանը։ Անցած տարվա օգոստոսից ի վեր այցելել եմ մի շարք վայրեր, որտեղ ՄԱԿ ՓԳՀ-ն հիմնավոր գործունեություն է ծավալում, և նշանակալի արդյունքներ եմ արձանագրել», – նշեց պարոն Ֆուկուշիման։ «Մենք խորապես համոզված ենք, որ թե՛ անապահով մարդիկ, թե՛ հյուրընկալող համայնքները կհաղթահարեն բոլոր դժվարությունները։ Ցանկանում եմ նաև ընդգծել, որ Ճապոնիայի կառավարությունը հայ ժողովրդի կողքին է և կշարունակի օժանդակել Հայաստանի առաջընթացի և երկարաժամկետ զարգացման հասնելուն ուղղված բոլոր քայլերին»։

Հայաստանում Ճապոնիայի դեսպանը եւ ՄԱԿ ՓԳՀ ներկայացուցիչը

Շնորհակալագիր Ճապոնիայի դեսպանատանը

Ճապոնիա - ՄԱԿ ՓԳՀ համագործակցություն

«ՄԱԿ-ի ՓԳՀ-ն խորին շնորհակալություն է հայտնում Ճապոնիայի ժողովրդին և կառավարությանը՝ տեղահանված ընտանիքներին սիրահոժար ցուցաբերած աջակցության համար», – ասաց ՄԱԿ ՓԳՀ հայաստանյան գրասենյակի ղեկավար Աննա Կարին Օստը միջոցառման ժամանակ։  «Ճապոնիայի առատաձեռն օժանդակությունը ՄԱԿ ՓԳՀ-ին հնարավորություն է տվել աջակցելու Հայաստանում ապաստանած շուրջ 32,000 անձի, ժամանակին և կենսական անհրաժեշտության օգնություն հասցնելով ընտանիքներին ու նրանց սրտաբացորեն հյուրընկալած համայնքներին»։

Ի հավելումն, Ճապոնիայի կողմից տրամադրված ֆինանսավորումը նպաստել է նաև ՄԱԿ-ի ՓԳՀ-ի կողմից պաշտպանությանն  ուղղված կարևոր գործողությունների իրականացմանը Հայաստանում, այդ թվում կարիքների բացահայտում և գնահատում, իրավական խորհրդատվության և սոցիալ-հոգեբանական աջակցության տրամադրում, կենսապահովման և ինքնաբավության բարելավման միջոցառումների, ինչպես նաև կանանց ու երեխաների դիմակայունության ամրապնդման ծրագրերի իրականացում, համերգների, կրթական և մշակութային միջոցառումների կազմակերպում։

Տարածել Facebook-ով Տարածել Twitter-ով